ئەمڕۆ 14.09.2024. بە هاوبەشی زۆرینەی پارت و ڕێکخراوە سیاسییەکانی ڕۆژهەڵاتی کوردستان، لە وڵاتی نەرویج، گردبوونەوە و ڕێوڕەسمێکی تایبەت ڕێکخرا. کە پارتی سەربەستیی کوردستانیش یەکێک بوو لە لایەنی ڕێکخەر.

کە تێیدا چەندین پەیام و بابەتی سیاسی تایبەت بە دووەمین ساڵیادی ئەو شۆڕشە مەزنەی ژینا (ژن، ژیان، ئازادی) لە لایەن کوردستانیانی دانیشتووی وڵاتی نەرویج پێشکەش کرا. هەر لەو پێوەندیەدا ڕەوەندی بەلووچستانی لە وڵاتی نەرویج بەبەشداری مەیدانی و پێشکەشکردنی پەیام، پشتیوانیی خۆیان لە خەباتی ڕەوای نەتەوەی کورد دەربڕی.

لە بەشێکی دیکەی کارەکانی ئەو ساڵیادە پارت و لایەنە سیاسییەکانی وڵاتی نەرویج بە لێدوانی تایبەت بۆ بەشداران، پشتیوانیی خۆیان بۆ خەباتی ڕزگاری و ئازادییخوازی نەتەوەی کورد و نەتەوەکانی دیکەی بندەست لە ئێران دەربڕی. هەروەها ئیدانەی پێشێلکارییە بەردەوامەکانی مافی مرۆڤیان لە لایەن ڕێژیمی ئێرانەوە کرد.

ناوەندی ڕاگەیاندن و ڕۆشنبیری پارتی سەربەستیی کوردستان.

ئۆسلۆ 14 ی سەپتەمبەری 2024